Landbounuus-podcast: Reën bedreig keerwal

‘n Boer uit die Soutpan-omgewing in die Vrystaat, Mimie Jacobs, sê goeie reën word wyd verwelkom maar dat dit egter kan veroorsaak dat ‘n keerwal in die Modderrivier naby haar plaas ineenstort. Jacobs boer met lusern en pekanneute langs die Modderrivier en sê die onlangse reën het nie ‘n negatiewe invloed op haar gewasse gehad nie. Sy deel egter dat daar oorstromings was en hulle moes besproeiingspompe sowel as pype van rivierwalle af verwyder. Jacobs deel haar bekommernis oor die keerwal en sê voortdurende reënval hou ‘n risiko in dat dié wal gaan breek, wat tot gevolg sal hê dat water wegvloei na die Krugersdriftdam toe.