Mangaung-metro vergader met Bloemwater oor verminderde toevoer

Daar sal na verwagting later vandag meer duidelikheid wees oor watertekorte in sommige dele van die stad nadat senior bestuur van die Mangaung-metro en Bloemwater vanoggend vergader. Metro-woordvoerder, Qondile Khedama, het vanoggend bevestig dat belanghebbendes agter toe deure is. Dit kom nadat Bloemwater na bewering slegs 30% van Bloemfontein en omliggende dele se normale watertoevoer verskaf oor die metro se beweerde skuld van R340 miljoen. ’n Plaaslike DA-raadslid en waterkenner, Rossouw Botes, sê bekommerde inwoners soek sedert gister antwoorde, nadat woonbuurte soos Pellisier, Lourier Park en Feirreira min watertoevoer het. Vanoggend het talle inwoners in dié gebiede se krane opgedroog. Hy verwag dat waterprobleme na die res van die stad kan uitbrei.

Bloemwater kon nog nie bereik word vir kommentaar nie.