Aanvalle op voedselprodusente is barbaars: VL

Vrystaat Landbou (VL) het die aanval op 'n bejaarde boer en sy vrou van Luckhoff gister helder oordag ten sterkste veroordeel. Dit kom nadat die 75-jarige Rudolf Van Heerden en sy 70-jarige vrou Aletta omstreeks 12:30 in hul plaashuis aangerand, vasgebind en beroof is deur twee mans. Vuurwapens, 'n onbekende bedrag geld en selfone is gebuit. Die rowers het met die egpaar se Toyota Corolla op die vlug geslaan. Die gesteelde motor se wrak is gistermiddag verlate by die Havenga-brug in die rigting van Petrusville in die Noord-Kaap gevind. VL se Tommie Esterhuyse sê die Van Heerden-egpaar is nie ernstig beseer nie en het behandeling in 'n plaaslike kliniek ontvang. Hy sê daar word nou saamgewerk met die polisie om plaasaanvalle en -moorde op voedselprodusente en hul werknemers te stop.

Nog niemand is in hegtenis geneem nie.