Aanklagte teen Bloemfonteinse ma en dogter teruggetrek

Aanklagte teen 'n Bloemfonteinse vrou en haar dogter, wat glo saamgesweer het om ‘n vrou te vermoor, is vandag in die plaaslike landdroshof teruggetrek.

Charmaine en Charndrei le Roux het glo hul tuinwerker Jerry Brummer gehuur om Karen Buschow, eienaar van ‘n plaaslike skool, te vermoor nadat Charndrei onder ‘n donker wolk by die skool bedank het. Buschow is in Junie verlede jaar oorval en vermoedelik met ‘n klip aangerand terwyl sy in Dan Pienaar gedraf het.

Aanklagte van poging tot moord, roof met verswarende omstandighede en sameswering tot moord teen Charmaine en Charndrei is teruggetrek.

Brummer sal egter weer op 15 Maart in die hof verskyn op daardie aanklagte.

Intussen sê die Le Roux-familiewoordvoerder, Anna-Marie van Zyl, dat hulle oorstelp is van vreugde.